طرائف ابو داؤود وعوض دكام؟؟

د. عوض دكام كان مدير مستشفى الاسنان وشالوه من المنصب .. وجابو مدير جديد

واحد من اصحابو لقاهو بيتحاوم بى بره .. قال ليهو مالك يا د. دكام حايم بي برّه ...ردّ دكام .. ياخوى ماضرتى جوه مابقدر ادخل ( بيقصد المدير الجديد)

**************

قالوا يوم ابو داؤود كان شغال حفلة وانتهت متأخرة ناس العرس اصروا عليهم يبيتوا في بيت العرس وفي الصباح ابو داؤود بتسوك في الماسورة برّه جات ماشة بي جنبه مرة كبيرة في السن قالت ليهو إمبارح العب ساهر بيكم يا ولدي.. قال ليها والله ياحاجّة العتب على النظر

*****************************

قالوا ابوداؤود كان شغال حفلة وبعد ما غني الفاصل الاول الجماعة نادوه للعشا فعلى حسب عادته قال عاوز يتعشى مع الجمهور ،قام قعد في طربيزة ومعاه مجموعة

جات الصينية الاولي عاين فيها لقاها فقهة (رقبة)..عاين للصينية التانية برضو لقي الضلع فقهة (الجماعة كانوا ضابحين خرفان كمية) التالتة برضو كدا

قام نادى العريس وقال ليهو اسمع يا خوي انتو ضابحين زرافة ولا شنو؟؟

***************************

قالو ابو داؤود مشى بيت عرس على اساس انه ح يقوم باحياء الحفل ،

لكنه لقى الفنان القدير المرحوم / خضر بشير واقف على المسرح ويغني..

ومعروف عن المطرب المرحوم خضر بشير انه بينفعل مع الغناء

عندما وصل ابو داؤود ووجد هذا المنظر سحب ليهو كرسى وقعد يتفرج وهو زعلان جداً جداً ، وكان قدامو شافع واقف يتفرّج في خضر بشير

قام ابو داؤود قاليهو ابعد كده ولا كده يا ولد هوي ، ما تقوم تطير فيك شلوفة ولاّ يفلقك اصبع *************

مرة عوض دكام جاء داخل العيادة بتاعته لقى في كشف المرضى اسم فتحي فرج الله لاعب المريخ زمان ... وبعدين ما كان شافو قبل كدا

طبعا فتحي فرج الله عيونو في (نص راسو) .المهم دكام عاوز يشوفو قام ناداهو أول واحد، لما دخل عليه ، دكام اتخلع بي شناتو ، كان متخيّله نجم وجيه

قال ليهو انت فتحي؟ قال ليهو أيوه أنا فتحي

د. دكام ردّ بسرعة طيّب فرج الله يكون كيف ؟؟؟

******************

ابوداؤد كان بغني فى حفلة والصف الاول كان

كلو جكس من الحجم العائلي كلو واحدة اسمن من التانية

وبعد الاغنية الاولى قامو الجماعة كوركو ليهو

بالله يا استاز "فريع البان" ...قام عاين ليهم وعاين

للصف الاول...وقال ليهم فريع البان وين مع

شجر التبلدى بتاعكم ده

****************

عوض دكام قال فى واحد

مشى يقلع ضرسو فى مصر

الدكاترة قالوا ليه يا زول

ما عندكم دكاترة اسنان فى السودان

السوداني قال ليهم في دكاترة

بس الحكومة مانعانا نفتح خشمنا

***********************

عوض دكام قال جاتو واحدة

جميلة جميلة جميلة

قدر ما فتشها لا سوسة ولا صفار

ولا الم ولا التهاب لثة

قال ليها انتى ما عندك حاجة

مشكلتك شنو؟؟؟

قالت ليه عارفة بس جيتك تعمل لى "فلجة "

***********************

مرّة عوض دكام كان واقف في محطة البنزين

ومعهو زوجتو في العربيه الكل كان بيعاين ومذهول بالجمال واللون الابيض اللامع بتاع مرتو دا

عوض دكام نزل من عربيتو وقال ليهم يا انتو ماشفتو ليكم سندوتش جبنة بالزيتون قبل كدا

--------------------------------------------------------------------------------

قال ليك عوض دكام كان فى فراش بكا

وكان يوم رفع الفراش وعوض دكام مشى عشان يدفع فى الكشف

واحد من اصحابو قال ليهو انت يا عوض مفروض تدفع بالدولار

عوض دكام قال ليهو ليه! فارشين فى السوق الحر؟

*****************

في عيادته في بحري وهو يعالج احد المرضى

..وعنده تلفزيون في داخل العيادة ذاعو مباراة هلال مريخ

..ومعروف عنه انه دايماً بيحضرها في الاستاد

...خرج الى الصالة ووجد مجموعة كبيرة من المراجعين والمرضى

...واتلفت الى التلفزيون ورأى ان المباراة ستبدأ واللاعبين بدأوا الدخول للملعب ...فالتفت الى المرضى قائلاً

انتو عاوزين الجد ولاّ ود عمو؟

انا من ما فتحت العيادة دي ما شفت لي زول كتلو ضرس

**********************

في لقاء في التلفزيون مع ابو داؤود و فى فقرة الاسئله الخفيفة

سأل مقدم البرنامج الفنان عبد العزيز داؤود عن أسامي بعض المشاهير

يعني لو ما كانو وصلو لي الوصلو ليهو الآن كانوا حيطلعوا شنو .

قام المقدم سألو عن محمد الامين ، ابو داود قال ليهو شايل كوْرتو و قاعد جنب الجامع الكبير

*********************

قالوا عوض دكام لمن كان فى الدفاع الشعبى جاكين فى الكلاكله وعطشوا ... مروا بى شفّع كده قام عوض دكام قال لى شافع عليك الله أجري جيب لينا جك مويه ... الشافع جاب المويه وسأل د. دكام

انت شغال ويني ياهناى ؟

دكام قال ليهو انا دكتور

الشافع عاين لى صاحبو وقال ليهو ….. العب ده عايز يدقسنا يافرده

ياخوى اشرب مويتك دى وادينا جكنا

قال دكتور قال

**************

عوض دكام يوم جاتو واحدة من بنات اهله زعلانة وبتحكي ليه:

قالت ليه كنت راكبة لي عربيه مع واحد شغال فى الحكومة نظام فضل ظهر وكدا اسموا يونس النباح اللى اشتهر بتقديم التعليق السياسى بعد نشرة ثلاثة فى الاذاعة .. المهم الراجل دا سالنى رايك شنو فى حكومتنا !قلت ليو سجم ورماد.. نبزنى ونزلنى من عربيتو،

فرد عليها عوض دكام عشان يطيّب خاطرها.. قال ليها هو ده نبّز خادم الحرمين الشريفين .. لمّا انتي يا خادم العباسية

--------------------------------------------------------------------------------

أبو داؤود كان سايق عربيتو أشرّت ليهو واحدة

متحنكشة دايرة تملـّح

وقف ليها وقام شغل شريط خاص بيهو أغنية نعيم

الدنيا وهي طبعاً ما عارفة انها راكبة مع أبو داؤود في نص الأغنية سألها بتعرفي الفنان دا ؟؟ قالت ليهو .. ياي.. فنان شنو؟؟ دا حمار

قال ليها قلتي شنو؟!!!!

قالت ليهو قلت ليك دا ما فنان .. دا عبارة عن حماااار.. ياي ...

أبو داؤود وقف العربية

ونزل مشى على الباب الراكبة جنبو، قام فتحو

وقال ليها.. أها بتنزلي ولاّ أرفسك .
_________________